Við skelltum okkur á bíó. Þrívíddar bíó í Kringlunni. Meet the Robinsons var skemmtileg upplifun fyrir krakkana. Fyrir utan Borgarleikhúsið fann Birta svo þetta flotta skilti.
Það var gáfuð kona sem sagði mér um daginn; "það að loka úti birtu er eins og að henda góðum mat". Þetta finnst mér nokkuð til í og því ekki farin að setja upp gardínur heima hjá mér ennþá.
Það er erfitt að fá reglu á börnin eftir sykursukk páskahelgarinnar. Enda fengu þau allt of mörg páskaegg. 
Skemmtilegt innlegg í tannlæknaumræðuna, - páskarnir. Risavaxin súkkulaðiegg troðfull af þykkum seigum karamellum. 
Ég reyndi mitt besta að láta karamellurnar hverfa en það var ekki að ganga of vel.
Logi fékk besta málsháttinn: "Allir eldar brenna út um síðir"
Sindri og Máni voru ekki eins slæmir í sælgætisátinu. Farnir að kunna sér hóf. Ég hinsvegar stakk hausnum ofan í risastóran konfektkassa og uppskar risavaxna bólu á mitt ennið. Pínulítið eins og ég sé að breytast í einhyrning.
Vona að Prada fari að skella á okkur blæjum. 
Svo er ég búin að vera að fylgjast með konusýningakynningum á skjá einum. Og ég bara skil þetta ekki. 
Þarna eru myndarlegar stúlkur sem koma fram og segja okkur frá skemmtun sinni, draumum og framtíðaráformum. - En ekkert af því tengist fegurðarsamkeppnum.
Þær ýmist njóta þess að spila fótbolta eða láta sig dreyma um að reka hundadagvist eða verða lögfræðingar - ég meina hvað eru þær að eyða tíma í að spranga þarna um á naríunum?
Allavega þá er ég farin að sofa og ætla að láta mig dreyma kaupmáttinn. Því ekki er ég að lifa hann.
Góða nótt. 
Engin ummæli:
Skrifa ummæli